منتديات قمه الجبل
عزيزٍي زآئرٍ منتديآُت قمه الجبل
نرٍحـب بك بالآبدآع والتميزٍ بين اقلام جآدة تستعد
لنثر كل مآ يفيد بالمعلومآت والموآضيع
الحصرٍيه ويسعدنآ ويشرفنآ انضمآمك الى اسرتنا




شاطر | 
 

 هذه قصيدة الشاعر (عبدالله ابن عبار)قصيده تغير من حياة الانسان والدين

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ابو عبدالله المضياني
avatar


مشرف الشيلات العام

مشرف الشيلات العام
معلوماتاضافية
رقم العضويه : 65
ذكر
عدد المساهمات : 60
تاريخ التسجيل : 19/10/2011
العمل/الترفيه : الهجوله

مُساهمةموضوع: هذه قصيدة الشاعر (عبدالله ابن عبار)قصيده تغير من حياة الانسان والدين   الثلاثاء نوفمبر 08, 2011 3:28 pm

اول ما قلت وبديت... بسم الله ربي سميت اللي له صمة وصليت... مالك الملك الرحمن

هو الرؤف الرحيم.. وهو الحكم والحكيم .. وهو الواسع والعليم.. يعلم ما يخفى وما بان

الملك رب الآنام.. هو القدوس السلام.. ذا الجلال وذا الإكرام..سبحان الباري سبحان

مؤمن مهيمن بالكون..متعالي عدل القانون.. الوالي مخرج ذا النون.. من مضلم جوف الحيتان

هو العزيز الجبار... هو النافع هو الضار.. وهو القهار الغفار... نطلب عفوه والغفران

هو العلي الكبير...وهو اللطيف الخبير.. وهو السميع البصير... وهو منزل وحي القرآن

هو العفو التواب... وهو الرزاق الوهاب..غني ومغني بالأسباب... وهو ضامن رزق الإنسان

ظاهر وباطن بديع... باسط البر الوسيع .. رافع سماه الرفيع... مسموك ولأله عمدان

هو الصمد رب البيت ... وهو الحفيظ المِقيت.. وهو المحيي والمميت ... يدوم ومخلوقه فان

خالق الخلق ومولاه ... واحد لا يعبد سواه .. الولي عظيم الجاه ... المتكبر عال الشأن

هو الشهيد الرشيد ... وهو الحميد المجيد.. وهو المبدي والمعيد ... وهو الوارث والديان

هو الغفور الشكور... وهو الحق وهو النور.. وهو المقتدر الصبور... قادر واللي راده كان

وهو الواجد والحسيب ... وهو الماجد والرقيب.. وهو المانع والمجيب ... وهو المعطي والمنان

هو المتين الجليل ... وهو القابض والوكيل.. وهو الهادي لسبيل ... وهو المقسط بالميزان

هو القوي العظيم ... وهو المنتقم الحليم.. وهو الفتاح الكريم ... ينفق ما صك البيبان

هو الأول بالوجود ... وهو الآخر والمعبود.. وهو الباعث والودود ... منجي نوح من الطوفان

هو المعز المذل ... وهو المقدم قدره جل.. وهو المؤخر رب الكل ... وهو معطي الملك سليمان

وهو الحي وهو قيوم ... وهو الباقي داين دوم.. وحشا ما يأتيه النوم ... وحشا ما يأخذه النسيان

جامع وخافض قدير ... هو البر بيده الخير.. مصور خلقه تصوير... محص المخلوق بحسبان

احد ما غير الله رب .. من خالف تعليمه تب.. بيديه الحكمة والطب .. وهو مبري سقم الأبدان

جل وتقدسه اسماه .. ماله مثيل ولا أشباه.. لا إله ألا الله .. رب الإنس ورب الجان

خلق آدم من فخار .. والجن أوجدهم من نار.. وخلق ما طار وما سار.. أشكال عباده وألوان

خالق الخلق ومنشيه .. بديع الكون وباريه.. المولى فضله نرجيه ... للخير يد الحيران

هو المعبود ولا شيف .. سبحانه ماله وصيف.. يلطف بالعبد الضعيف .. وكلٍ يرجيه الحنان

هو المتنزه بالذات .. كامل في كل الصفات.. وهو فطار السماوات .. والأرض أودعها قيعان

يسمع صوت اللي ناداه .. ومن نادا باسمه لباه.. نرجي فضايل حسناه .. ونشكر فضله والإحسان

كل عباده له يرجون .. وكلٍ يطلب منه العون.. ومن طاع إبليس الملعون .. يستأهل طرد وحرمان

يا الله يا مدير الأفلاك .. يا مالك كل الأملاك.. يا رازق عمي الأسماك .. في لج بحور وخلجان

يا مجري زعوج الهوج .. ينشر به سحاب الموج.. ينبتبه خمائل ومروج .. وأزهار الورد وريحان

يا ملقح ريح الهبوب .. تسوقه من صوب لصوب.. والمزن بقطره مسكوب .. من سيله يملا الغدران

يا مخضر صحصاح البيد .. يا فالق حب الحصيد.. يا معيد الجذع الهميد .. يا مورق جرد الأغصان

يا رافع سبع الأطباق .. اعتقنا من النار إعتاق.. لك نبتهل من الأعماق .. من قلب مخلص ولسان

أرشدنا لدرب اليقين .. ولا تجعلنا من الغاوين.. وأصلح دنيانا والدين .. وارزقنا بجنة رضوان

طلبتك يا رب الناس .. بك نعوذ من الوسواس.. ومن شر إبليس الخناس .. ومن سؤ وكيد الشيطان

اطلب عفوك يا مولاي .. ولا بث لغيرك شكواي.. لا تشقيني في دنياي .. واشرح صدري للإيمان

يارب لعفوك مشتاق .. لا تجعلنا من الفساق.. وهد اللي قلبه ما فاق ..داله في نومه غرقان

يا الله نطلبك الصلاح .. ما عاد العمر إلى راح.. ولا عقب الشيب إلى لاح .. من شبوا صاروا شمطان

بانت وضح المغاتير .. والشيب يسمى نذير.. واللي به شيبٍ غزير .. يحسب من ضمن الشيبان

شيب العوارض والروس .. ما ينفع به حلق الموس.. ولا فاده صبغ الطاووس .. بياضه يلمع لمعان

من يصبغ صبغه ما ثاب.. ما عاد الذقن إلى شاب.. ما ينفع كتم وخضاب .. في قوعه مثل الصيبان

يا الله في حسن الختام .. راحة ليالي وأيام.. كنها طيف المنام .. خيال النيم الحلمان

اسمع كلامي من جد ..لازم تستيقظ لابد.. عمرك يا ابن آدم له حد .. يقف في ميد الميدان

عمر يا ابن آدم قصير.. بالك لا تنسى المصير.. ما يوجد للعمر اسبير .. ينتهي ولا له ضمان

عمر يا ابن آدم قصيف .. احذر من كثر التسويف.. لك موعد مابه تطويف .. ولا يفهق يومٍ يا حان

عمر يا ابن آدم محدود .. ولا تنسى اليوم الموعود.. بين البيض وبين السود .. لازم قولة مات فلان

عمرك يا ابن آدم قليل .. تزهب لجل الرحيل.. لو طال العمر الطويل ..لابد يطويه الزمان

عمرك يا ابن آدم يفوت .. لو طول يقفاه الموت.. في نعشٍ وألا بتابوت .. صيورك ترحل عريان

سيف المنايا فتاك .. وكلٍ يا تيه الهلاك.. ما على الدنيا ملاك .. في جوف الدنيا المسكان

حاذور الدنيا تغريك .. واطلب عسى الله يهديك.. ولا تنسى يومٍ يأتيك .. تدرج في بيض الأكفان

عمرك يا ابن آدم محسوب .. ونفسك لا تحملها ذنوب.. ملزوم لربك تتوب .. قبل تدفن بالكثبان

من عمّر بالدنيا مات .. زالت قياد وباشات.. وبادت حكام وسادات .. و أفنت أمار وشيخان

يا ما زالت من حكام .. لهم هيبة واحترام.. عقب الدولة والنظام .. وين السلطة والسلطان

ما خلت شيخ ولا أمير ... ولا منصوب ولا مدير.. حتى الريس والوزير ... والحاجب والترجمان

كم من جبارٍ عنيد .. شجاع وباسه شديد.. أصبح بالبرزخ وحيد .. جسمه ترعاه الديدان

من سكن بالدنيا زال .. تعاقب عليها أجيال.. شالت مغاوير أبطال .. و اقفت بقروم الشجعان

ناخذ عبره بالفانين .. من حكام وسلاطين.. وين اسكندر ذا القرنين .. وين النمرود وكنعان

وين الخليفة هارون .. وين المتجبر فرعون.. وين المتكبر قارون .. وين المتبجح هامان

من هرفت له دنياه .. لابد من يومٍ تجفاه.. انظر وش سوت بالشاه .. ما تقل حكم في ايران

الماضي يعطينا أخبار.. عن وضع الناس وما صار.. انظر وتشوف الآثار.. بديار الحجر ونجران

والحاضر يعطينا الدرس..عن واقع دنيانا الشرس.. وش حصل بديارالفرس..وش صارفي ديره لبنان

دولاب الدنيا يدور.. لو تقبل تعطي دبور.. هدت عمائر وقصور .. وخربة مدن وبلدان

ما عن واقعها مناص.. ولاهي هقاوي واخراص.. حاسب ضميرك بإخلاص .. يا اللي بالدنيا شقيان

الدنيا عبر وأمثال ..تقلب من حال لـ حال.. وخلت بعض الدور أطلال .. وهدمة صرح البنيان

نعيم الدنيا ما دام .. لأنه أضغاث الأحلام.. تجعل العامر حطام .. وتبلش بمرخى البنيان

نعيم الدنيا تزييف .. ولحدً تجيله بالكيف.. مثل الهبايب بالصيف .. وألا الربيع بنيسان

الزايد بالدنيا نقص .. تقلب تقليب الطقص.. يومً حزن ويومً رقص ..تبهج قلب البهلوان

نعيم الدنيا جذاب .. وعمار الدنيا خراب.. مثل صحصاح السراب .. ما يشرب منه العطشان

نعيم الدنيا ينعاف .. ماهو مقاصد و أهداف.. خذ النصيحة بالقاف .. وفهم مضمون القيفان

قلته ما قصدي قداح .. ولاني للعالم مداح.. كلامي قلته نصاح .. من صما صيم الوجدان

القاف أوضح معناه .. للي يسمعه ويقراه.. اهدي مضمون الوصاه .. وعندي دليل البرهان

قلت ومن شعري نظمت.. وأخير من القول الصمت.. نصيحة فيها ساهمت ..عسى ما تذهب مجان

قلته جهرولأهو همس..أركان الإسلام الخمس..أوضح من بياض الشمس.. فرضها الله خمس أركان

واجب دينك لا تنساه .. ولا تهاون بالصلاه.. والشهادة و الزكاه .. والحج و صوم رمضان

أد الواجب بالتمام .. ولا تقرب مذهب هدام.. شرفك الله بالإسلام .. دينك هو خير الأديان

اجتهد وربك يا جرك.. واحذر من شك ومن شرك.. واخلص لله سرا يرك.. واتقه قدر الإمكان

احذرتنغر في دنياك .. واحذر لا تتبع هواك.. وتب للمولى عن خطاك .. وابعد عن كفر وطغيان

أجهد في كسب الثواب .. وراك حساب وعذاب.. ربك يتوب لمن تاب .. ولا تمادى بالعصيان

استثمر كل الأوقات..الدقايق والساعات.. موسم عملك إلى فات ..تعض إبهامك ندمان

واحذر نفسك لا تغويك..على الظلال توديك.. والمغوي بالك يغويك .. من طاع الغاوي غويان

عندي للغاوي تنبيه .. شهرته ماني مخفيه.. ندعيه بصوتٍ يوحيه .. وأعلنته بالقول إعلان

طالع من حولك وتشوف..ظلم وجوروذل وخوف.. حرب وكوارث وصدوف..قحط وزلزال البركان

طالع شرق وشف شمال .. تسمع مصايب وأهوال.. كله من خبث الأعمال .. والعمل بالعالم شان

انظر وتشوف الفجار .. من طواغيت وكفار.. وين اللي لدينه يغار .. صابه نكبه وامتحان

كثر بالناس الفجور .. والتكبر والغرور.. والنكد وأعمال الجور .. وكلٍ دينه عنده هان

كثر بالناس الفساد .. والظغاين والأحقاد.. ومع ذلك زاد الإلحاد .. وكاده تعود الأوثان

كثروا بالناس الطاغين .. عصبة ماركس ولينين.. ماهم بالواقع دارين .. وعن الحقائق طرشان

كثر بالناس الشذوذ .. وكلٍ يطمح بالنفوذ.. حتى السافل والمنبوذ .. يقدح زنده بالصوان

كثر بالناس العقوق .. ولا تقل بينهم حقوق.. وكلٍ يصد ويموق .. ولا يشفق عقب الهجران

كثروا بالناس الأشرار .. وكثرة تيه الإبصار.. وكلٍ يملي بالأفكار .. يحسب ما غيره فهمان

ضاع من الناس الناموس .. والشيمة بيعة بفلوس.. وارتفع قدر البلوس .. واعتز الهايف بوقان

عصرٍ به قل التوجيه .. الله يستر من تاليه.. فيه الحاصل لو نطريه .. صار البردون كحيلان

المستغرب ينشد ليش .. كيف السحلي صار حنيش.. والصقلاوي صاركديش .. والبغل سموه حصان

كلٍ في هرجه يخوض .. ينطق لو قوله مرفوض.. الأرنب سادة بالروض .. والصيرم ماله جنحان

قالوا علام الحرار.. ما يقنص فيها الصقار.. طاحت من فوق الأوكار.. وصار الماكر للسمقان

اللقلق بالصيده فاز.. وصعد من فوق المركاز.. والسمونه صارت باز ..والرخم صارت عقبان

صارت من حض الهليب.. بالسبق خلا العريب..لا عبره لو شفت الذيب .. يجفل من شوف الطليان

حصل في العصرالحديث..والفاهم يدري بالحيث.. تساوى الثعلب والليث .. والوبر مثل السرحان

واليوم النمر الفروس .. يشكي من وقته معكوس..الكرعان أودعها روس..والروس أودعها كرعان

عصر الموضة والموديل..هو سبب خراب الجيل.. وأهل الكوره والتمثيل..يدعون نجوم وفرسان

شباب ألامه يضيع.. ما همه غير التشجيع.. يسمع تعليق المذيع .. ويرقص وسط المهرجان

واللي إلى فاز الفريق .. يدمي كفه بالتصفيق.. مثل اللي بعد العليق .. يمرح بالبيدا فسقان

الفوز الزايف منسوخ .. ما دامه في لستك منفوخ.. النصر نصر الصاروخ ..والدبابة بالميدان

افهم مقصودي يا صاح ..لا يغرك قصدٍ ناح.. لا تجعل سدك مباح ..احفظ سدك بالكتمان

اسمع وأعطيك إرشادات..وافهم مضمون الغايات.. أوصيك بصبروسكات .. ولا تنسى حكمة لقمان

خذ حذرك لو شفت الثلم ..عصرك هذا كثر الظلم.. ونزل تقدير أهل العلم .. وعز اللاعب والفنان

وضع المسلم ماله حل .. قالوا عصره مبطي زل.. العالم والعابد ذل ..مضهود بكل الأوطان

شنوا ضد المسلم حرب .. بالشرق وبديار الغرب..والشاهد مفعول الصرب..والشيوعي بأفغانستان

الوضع الحالي خطير..وش سوا السيخ بكشمير.. وعم الصومال التنصير.. وجنوب بلاد السودان

يا عرب يا عيب العيب .. تحتار أفكار اللبيب.. كيف الداعي والخطيب.. يمنع من رد الرهبان

الامه تحتاج اسعاف ..واقعهم بالعين يشاف.. قبل يصير انحراف .. ونسير بركب العدوان

من فاخت مسلاك الدرب.. ماعرف الجمع من الضرب.. واللي خالط عيط الجرب..لازم يطلا بالقطران

حصل بالدنيا تغيير .. دمر عادتنا تدمير.. أهفا الذمة والضمير.. والسالم قلبه وجعان

صاب المجتمع اهتزاز .. والمنكر وسط التلفاز.. وكلٍ ركب دش إجهاز .. وجاب أمريكا واليابان

والفتى قلبه مفتون .. سلمه وتراثه يهون.. صار يقلد مستر جون .. ويرطن رطين أمريكان

خربوا طبع الشباب.. يمشون بسلم الأجناب.. لولا الخوف من العقاب ..ساروا بالشارع ملطان

راحة عادات الأجداد .. واختلف سلم الاجواد.. كلٍ شبعان من الزاد .. مخباه وبطنه مليان

كلٍ تغير مبداه .. والسلم الماضي خلاه.. مرامه يملا مخباه .. ويرصد بالبنك الميلان

وين سلوم اهل العادات..وين النخوه والشومات.. راحة ما ترجع هيهات.. مع دور حقوق الجيران

وين الحشمة والوقار .. راحة مع عصر الأبرار.. الجار أهفا حق الجار.. وكلٍ من جاره زهقان

كلٍ قصيره يشناه .. يشكي من قربه مأساة.. يقول ابنه ما ينهاه .. ولا يمنع شر الورعان

كلٍ يقول القصير.. ما يلقى جاره تقدير.. قصرته شر وشرير..أقشر وعياله قشران

وأبي أنصحك من الصميم .. ابعد عن قرب الزنيم.. ترى لو قدرك حشيم ..لازم يوريك الحقران

اللي جاره خايب سد.. يا شافه عن وجهه صد.. يا كبر الفرحه لو شد .. ينذر لفراقه خرفان

من عافك جازه بالترك .. لو قدرته ما قدرك.. ما حشمك ولا قدرك .. ومن صاحب خايب ينهان

عليك بقرب المأمون ..عند الشدايد مبخون.. صديق وطيبه مضمون .. لو شاف الغره ما خان

خل الطيب لك رفيق .. تحتاجه في وقت الضيق.. يظهر لك صدق الصديق .. حزه تحتاج الصدقان

خاو رجالٍ ملتزمين .. على الطاعه متخاوين.. كلهم نقوه صافين .. أذخرهم لك عصبه وإخوان

عليك بصحب الأخيار.. تسمع مواعظ وأذكار.. وحديث وحكم وأشعار.. تزيل هموم الحزنان

تأخذ بالقول الموثوق .. قول الصدوق المصدوق.. وأبو بكر والفاروق .. والطاهر و علي وعثمان

تأخذ كلامٍ مسنود ..عن مسلم وابن مسعود.. هذا الكسب وهذا الفود .. ماهو فوايد عوجان

عن مجلسهم غاب بليس .. ما معهم نذل ولا هيس.. ما يشقا فيهم جليس .. رافقهم وانت الربحان

وابعد عن صحب الأنذال..مجلسهم ما سرالبال.. تسمع طاري قيل وقال .. ومن جاهم يقفي زعلان

بعض المجالس شلات.. يغثك بكثر أللجات.. لو نادوا لك بالأصوات.. جنبهم ترهم قومان

ابعد عن شيطان الإنس.. مهو موثوق ولا ونس.. يتقلب من جنس لجنس..ومن زود النعمة بطران

أنصحك وخذ مني شور..لا تقرب خطو المثبور.. اجعل لك من دونه سور.. من رافق فاسد خسران

اسمع وأعطيك التوصيف.. وافهم مقصود التصنيف.. الواطي لو داره ريف..لا تقرب منها فدان

رجل تشوفه بلاف.. ما نفذ دوم ولا خاف.. لو يرقى بروس الاشعاف ..لازم ينزل لطمان

ورجلٍ تشوفه خبيث .. فكره متلوث تلويث.. مثل المكلوب الغليث ..هريف ال*** الضرمان

ورجلٍ تشوفه ملسون .. سكين لسانه مسنون.. حكيه خماين وظنون .. يحسب من روس الكذبان

ورجلٍ تشوفه خراط .. عده من صلب القرباط.. هرجته مجادل وغلاط .. مثل العزوم بلا عنان

ورجلٍ تشوفه مطفوق.. ما عنده شم ولا ذوق.. ما يفهم معنى المنطوق .. يلوخ بوسط الديوان

ورجلٍ تشوفه ملاق..صاحب تمريخ ونفاق.. الفاسد شين الأخلاق.. يزوم سوات الطنيان

ورجلٍ تشوفه غدار.. دايم بالصاحب مكار.. خسيس وايضا سحار.. يحسب عراف الكهان

ورجلٍ تشوفه خداع .. دايم بالصاحب طماع.. يكيل ويبخس بالصاع .. ويبيع بنقص الأثمان

ورجلٍ تشوفه مذموم .. يفرح بالعايز واللوم.. خنجر لهاته مسموم .. وفي عرض الغايب طعان

ورجلٍ تشوفه نمام .. مغرم في نقل الكلام.. مقصوده قطع الأرحام .. وتفريق قلوب الخلان

ورجلٍ بالنمه هراج .. يلقى لهروجه رواج.. مثل الصراه الهماج .. تاليها وحل وسيان

ورجلٍ تشوفه هبيل .. بالك تحطه عميل.. حيثك تحت طاب الليل .. مخطر من لدغ الديبان

ورجلٍ تشوفه هذار.. وسط المجالس ثرثار.. له ملسن مثل المنشار.. يقول وهرجه هذيان

ورجلٍ تشوفه غشاش ..لا يغرك حيثه لاش.. ماهو للجزله حواش .. ولا عمره دق المهوان

ورجلٍ تشوفه سفيه .. جنب دربه لا تماشيه.. لا تباريه ولا تخاويه .. بذي لسان ولعان

ورجلٍ تشوفه شمات.. دايم يدور الهزعات.. يا قضا منك الحاجات.. يعلن جحود ونكلران

ورجلٍ تشوفه سكار.. ما يدرى من حكي العار.. يبحث عن منتوج البار.. وكل يوم تشوفه سكران

ورجلٍ تشوفه بخيل.. ما عمره حاش الجميل.. ولا يكرم وفد النزيل..ومن ضافه يقفي جيعان

ورجلٍ تشوفه منبوز.. ما ينفع في وقت العوز.. خله يقفي للهاموز.. قربك للخايب نقصان

قلته مواعض وارشاد.. ماهو سب ولا انتقاد.. توصيف لبعض الأفراد.. منضومه مثل المرجان

نصيحه والشعر شعور.. ناخذ بالقول الماثور.. افهم ما قلت ومشكور.. وسامحني كاني غلطان

عطيتك يالعاقل درس.. ملحوظه تكتب بالطرس.. احفض بذارك بالغرس.. واستثمر طلع البستان

وإلى بغيت الزواج..لا تاخذ بنت الهلباج.. لو يحمل في متنه تاج .. ما فاده حمل التيجان

ولا تاخذ بنت المدنوس.. خلفة زلايب وهدوس.. تلقى عروقه فيها سوس.. والغصن الناعم خرثان

ولا تاخذ بنت القطوع .. يجي ولدها مسبوع.. ماهو لأمر الوالد طوع .. حيثه معامق رديان

ترى خطاة المدام .. تطيعك ما دمت غلام.. والشايب ماله مقام .. يا كبر قالت خرفان

ولا تاخذ من عرق العوب .. قواية راسه عذروب.. لازم تلقى بك شاذوب .. وتترك بحالك ذهبان

يا صارة عوبا وعديم .. دايم شيطانه رجيم.. عفها من بد الحريم ..لا تقربها من النسوان

واحذر شينه الضمير.. تذهب مالك بالتبذير.. تلقى ورعانك دشير.. يسعون سوات اليتمان

واحذر دنست الشليل .. ما ياثق فيها الحليل.. عرضها مثل المنديل .. لا تغرك بالفستان

لا ترميك بكثر الزين..بيض الخد وسع العين..مافاد الشكل الحسين.. لو تشبه ريم الغزلان

قشرا المخبر لاتوهمك..ماتقدرك ولاتحشمك..ماتوافقك ولا تلايمك..لو شفت المظهرفتان

اسمع قول ابن عبار..وخذ المعنا باختصار..هداج النبع الفوار..ما يشبه نبع الحسيان

اسمع قولي بانتباه..كلٍ عند الله جزاه..العاقل يصلح ضناه..ومن يمشي بالحق معان

نصحتك راقب ولدك..شانه يهمك وحدك..ان صلح يكبرسعدك..وان خاب مالحقك صان

عودرجلك للنوماس..وخلك فطين وحساس..قبل تبني قو الساس..وجود صبات السيسان

راقبه وخلك حريص..لاتجلب حضك رخيص..درب طيرك للقنيص..واحذرطير ابن برمان

الولد وده تدريب..حتى يتعود للطيب..ابعده عن طرق العيب..واحذر يقع بالهوان

الولد وده تعليم..حتى يمشي مستقيم..واللي ما عقله سليم..قلبه وعيونه عميان

الولد تركه ما جاز..راقبه وياخذ ممتاز..كان انه بالدراسة فاز.. نال العز وحضه زان

الولد زين مرباه..سنعه وعدل عوجاه..راقبه واعرف ممشاه.. مادمت لخيره شرهان

الولد خله نشيط لا يصبح خمله بسيط..لا تدزه مثل امقيط..وتجدعه وسط القلبان

الولد وده مجهود..حيثك عن فعله منشود..ارشد قبل يقسى العود..مادامه عوده ليان

ولدك الله به وكلك..كان انك اهملته يهملك..وان ما ربيته خجلك..خلاك الخايب خجلان

نصح الوالد له مفعول..انصح مادامه مقبول..ترالبيت سوات الشول..ما يسرح غير برعيان

الولد خله صعصيع..يظهرعطوف ومطيع..احسن عليه الصنيع..ويصير النشمي ديقان

خله للزينه يعتاد..وعن رفق الفاسق بحياد..لايصاحب خطو السرماد..مسرد وربوعه سردان

راقب نجلك لا يخيس..لايصحب خطو الخسيس..وان فسد حضه تعيس..من رفقة بعض العشران
لاتجعل وقته فراغ..يمشي تفريع بلا شماغ..افهم كانه عقله زاغ.. واقر الخط من العنوان

كانه رافق منحرفين..واصبح للخايب قرين..هستر واغواه الخدين..وداس الشيمه بالحذيان

وكانه رافق هايت هات..من ضمن شلل الحارات..فتش جيبه تلقى ابكات..تعلم شرب الدخان

وعقبه يقع بالمشروب..مابين مخدروحبوب..ويصبح للصلطه مطلوب..ومقره عند السجان

بهملك ربك جازاك..سيبته واحمل ماجاك..كلٍ يشناه ويشناك..تموت وقلبك حرقان

حيثك تجمع سحت القوت..تغيب وبيتك مفلوت..ولدك اغواه السربوت..وانت بحاجاتك بلشان

ابنك ضاع وجاه اهمال..تركض وملهيك المال..واللي مارباه رجال..مصيره يطلع كوبان

دامك سيبته واهملت..وخليته بالشارع فلت..وش كسبت وش حصلت..تمرد واصبح فلتان

مادامك له ما ادبت..خسرت وباعمالك خبت..وإلى كبرت وشيبت..عن خدمتك اصبح كسلان

مادامك له ماربيت..سيبته ضمن الهييت..دايم ما يجلس بالبيت.. يلوح بظل الحيطان

شفته مع خطو الحليف..ولا تنها عن درب الحيف..اما موبز بالرصيف..ولا في باب الدكان

شفته ولا تراقب عليه..ولاتنشد عن فعله ليه..حتى خاواه السفيه..واصبح من ضمن السفهان

شفته في حال الممهون..غويان وقلبه مشطون..ماعندك قلب ولاعيون..ولاتشوف حيود الضلعان

شفت الخنافس بالراس..ولا عندك بالمظهر باس..لوشفت شرفه ينداس..حسبته مزح الصبيان

ما راقبته لاينغر..ومع درب الفاسق ينجر..حتى رافق عصبة شر..واليوم الخايب نشبان

عن مسيره ما تنهاه..ولاتدري باللي سواه..حتى لوشفت اخوياه..يمشي مع شلة زعران

شفته مع ربع التفحيط..وان عذلته يستشيط..معجب من صوت الشريط..ومن صوت المطرب طربان

شفته بالشارع يهيم..يمشي مع خطو النديم..يسوح وكنه بهيم..ولا يفقه مثل الحيوان

كيف انك خليته مد..والليل أمساه ولا رد..يسرح باليوم وبالغد..ولا تدري وين ابنك كان

كيف انك خليته سج..ولا راقبته حتى دج..يا كبر عن قربك هج..يسهجك وكنك طوقان

يا صابه فشل واحباط.. ياخذ بالحارات اشواط..يحمل بخاخ وخطاط.. بس يشخمط بالجدران

اسمع كلامي بالقيل..عطيتك شرح بتفصيل..قلت وسجلته تسجيل..على مكراة الشرطان

واخر كلامي بالقول.. صلى الله على الرسول..شفيع الخلق المرسول..محمد صفوة عدنان



مع تحيات ابو عبدالله
الرجوع الى أعلى الصفحة اذهب الى الأسفل
 

هذه قصيدة الشاعر (عبدالله ابن عبار)قصيده تغير من حياة الانسان والدين

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات قمه الجبل  :: قمة المنتديات الادبيه :: شيلات وقصائد-