أثني على من للثــنـــاء يــستــحـــــقون
والمدح يـــزهــا فـي عـيال الحـمـأيل
الناس تاخذ والمـــضيـــــان يـعـطـــون
وايدينهم طالت على كل طايل
اللابة اللي بالمواجيب يوفون
نعم الرجال معربين السلايل
تاريخهم ماخالفه ريب وظنون
واضح وضوح الشمس والشك زايل
اللي بهم من سالف الوقت مبخون
وتميزوا عن باقي عيال وايل
عون لمن ظن وهقا فيهم العون
وباللي نصاهم يكسبون الجمايل
لاجاهم اللي يشكي الضيم والهون
شالو حموله لو حموله ثقايل
نعم الرجال وباللوازم يسدون
والطيب فيهم له شهود ودلايل
عوق الخصيم وبالوغى يستميتون
ولايتقي من شرهم كل عايل
العزوة اللي عزها والي الكون
مثل السيوف المرهفات الصقايل
لاجردوها باللقا مايهابون
ولايحسبون حساب كل القبايل
كم فارس برماحهم صار مطعون
من عقب ماوروه نجم القوايل
خلوه وقت الحرب خاسر ومغبون
وباسبابهم شاف الشقا والهوايل
عذروبهم عن جارهم مايصدون
واقوالهم متبوعة بالفعايل
باللي يجيهم يفرحون ويهلون
والضيف عنهم مايدور بدايل
ماهو غريب وفيهم الطيب مضمون
لو تنضرب فيهم جميع المثايل
نعم بهم تنقال مره ومليون
والمرجلة ماتنوخذ بالسهايل



مع تحيات ابو عبدالله

ونعم والله