السلام عليكم ورحمة الله وبركاته هذي قصيدة الشاعر عبدالله بن دهيمش بن عبار العنزي

قصيدة الطير حيث كان في نجران عام 1388هـ وفي ذات مره صعد في ‏
راس ضلع فشاهد طير وبدأ يخاطبه بهذه القصيدة فيقول :‏
البارحة سهـران مـن غـب الأحـزان أجــاذب الــونـات مــا أحـٍد درابــي ‏
مـا شاقـني سمع الأغـاني والألحـان ولا هـمني سهـرات عـبـد الوهابي ‏
ولا أبغـي لحن سلوى ولا فهـد بلان ولا أبغي سميرة لو هي ليه تجابي ‏
ولا سـر بـالي كـل مـطـرب وفــنـان مقصود شف البـال غـاية إطـرابـي ‏
انـا شفـاتي شوف ربعـي والأخـوان ومشاهـد الأحبـاب عـقـب الغـيابـي ‏
قـلبي عـليهـم دايـم الـدوم عـطشـان عـزاه يـا قـلـبـي مـن الـوجـد ذابـي ‏
الـمسكـن الـلـي مـا لـنـا فـيـه خـلان ما كـنـه ألا مـن الـديـار الـخـرابــي ‏
وش يجمع اللي صار بديـار نجـران لـلي شـمـال وحـال دونـه هـضابـي ‏
أمس العصر عديت في راس ما بان أهيـم وأصعـد عـالـيـات الـروابــي ‏
وشاهدت لي طيـر يرفـرف بجنحـان وبديت أسأل الطير من وجد مابـي
أبي انشدك يا طير عن حال الأوطان هـي أمحـلـت ولا ربـيـع وخصابـي ‏
مـا تبـدلـن يـا طيـر وتـصيـر إنسـان عـطـني جنـاحيـنك ودونـك ثـيـابـي
أعطيك عـفشي والحفيظة والأموان وأعـطيـك كامـل راتبـي وأنـتـدابـي ‏
قصـدي أسافـر صـوب حيي وحيـان أفوج مـوجـات الشـمـال بـعــبـابـي
قال أتـرك النوهـات والوجد يا فـلان حـاشـى جـنابـك مـا يـبدل جـنـابـي ‏
مارأسمع أبي أخبرك في كل ما كان أسمع وخـذ مـني صحيح الخطابـي ‏
كان أنت تنشدني عـن الربع شفقـان مـن دون ديـرتهـم وسيع الرحابـي ‏
مـن دونهم حالـت صحاري وريعـان ريـدا أيتـزاوم فـي رباهـا السرابـي ‏
أتـلا خبـرهـم غـربـوا عـقب مقطـان بـيـن الحـزوم النـايـفـه والشعـابـي ‏
وديـارهـم صارت خبـاري وغـدران ونبـت الكما والعشب بيـن الطنابـي ‏
وشفت البيوت الشامخه تقل ضلعان وسـط الخمايـل شامخـات القطابـي ‏
والطيـر مـا يقدر على النطق بلسان مـا يـلفـظ الكـلـمـة ولا هـو يـنـابـي ‏
كـلام ابـن عـبـار صـاغـه بـقـيـفــان مني سـوأل الطيـر ومني الجوابـي